雲迪碧克再受冷落　香口膠怒掟蘇斯克查！

足球博彩神器，每日重心提供盡在《彩報》：http://win.on.cc/football/　

曼聯喺歐聯分組賽2比1絕殺維拉利爾，贏波過程相當驚險，當「紅魔鬼」完場前換人希望搵到致勝入波，領隊蘇斯克查寧願用費特洛迪古斯都唔用雲迪碧克，結果呢位荷蘭中場即時喺後備席大發脾氣，怒睥蘇斯克查兼向住領隊方向怒掟香口膠，要身邊隊友幫忙安撫。

雲迪碧克上年由阿積士加盟後，一直得唔到蘇斯克查重用，今場比賽去到89分鐘仲係1比1嗰陣，蘇斯克查換入連格同費特洛迪古斯希望搶晒3分，雲迪碧克對於冇份落場非常不滿，鏡頭影到換人嗰陣，雲迪碧克非常憤怒，更將口入面食緊嘅香口膠拎出嚟掟向蘇斯克查嘅方向，身邊嘅艾歷拜利同後面嘅甸恩軒達臣都齊齊輕拍佢作出安撫。

對於雲迪碧克嘅舉動，唔少網民都表示體諒，批評蘇斯克查長期冷落雲迪碧克並唔合理，今場先後換入尼曼查馬迪同費特洛迪古斯2個防守中場，都唔用創造力更強嘅雲迪碧克係講唔通。雲達碧克今季英超只係踢過5分鐘，上場歐聯雖然正選上陣，但只係踢半場就被換走。