歐聯關舒列夫咩事？古積特被寸爆

最強博彩盤路過關神器《串績王》：http://win.on.cc/football/　

歐聯分組賽2輪完結，最大驚喜肯定係摩爾多瓦球隊舒列夫，佢哋作客擊敗皇家馬德里後，喺小組2戰全勝排榜首，有機會第1次躋身分組賽就晉級。舒列夫嘅歐聯童話之旅，就令之前睇死仍哋嘅荷蘭名將古積特冇晒面。

當舒列夫喺外圍賽晉級後，曾效力利物浦嘅古積特就公開批評歐聯賽制：「我明白歐聯係一個畀聯賽冠軍參加嘅比賽，但好似舒列夫呢啲球隊，同歐聯根本扯唔上任何關係。」舒列夫唔單止係第1次參加歐聯分組賽，亦係摩爾多瓦第1次有球會躋身歐聯正賽。

連贏薩克達同皇家馬德里後，舒列夫教練華尼杜比就反駁古積特：「我哋係一支真正嘅球隊，亦證明歐聯係屬於我哋嘅地方，古積特係個偉大球員，佢話歐聯唔關舒列夫事，我好開心可以摧毀佢嘅言論。」