熱身賽照踢「刷」數據　C朗殺勻46隊！

足球博彩神器，每日重心提供盡在《彩報》：http://win.on.cc/football/　

葡萄牙周日(10日)凌晨熱身賽主場對卡塔爾，多位主將都獲免役留力下場對盧森堡嘅世盃外，不過36歲王牌C朗拿度照樣正選上陣，雖然只係踢45分鐘，但半場時間已經夠C朗繼續「刷」紀錄，卡塔爾亦成為C朗歷來第46個「攻陷」嘅國家隊，打破世界紀錄。

葡萄牙今場以大量副選出戰，般奴費南迪斯、貝拿度施華只係後備上陣，魯賓戴亞斯、祖奧簡些路、比比等更加冇份落場，不過C朗領軍嘅葡萄牙戰鬥力仍有保證，上半場就係靠C朗入波領先1比0，下半場再由荷西方迪同安達施華各入1球，大勝3比0完場。

C朗今場繼續創造紀錄，第181次上陣令佢超越沙治奧拉莫斯(180場)，成為國際賽上陣次數最多嘅歐洲球員。另外，C朗歷來用入波攻陷過46支唔同國家隊，亦係史上攻破國家隊隊數最多球員。C朗賽後喺社交網留言：「代表葡萄牙出賽同入波，我一如既往覺得自豪，我哋齊心實現夢想，就係出線2022世界盃決賽周。」