唯一全勝球隊　丹麥下場贏波即出線

最強博彩盤路過關神器《串績王》：http://win.on.cc/football/　

丹麥繼續書寫「童話故事」，呢支「神奇球隊」喺周日(10日)凌晨世界盃外圍賽歐洲區F組，作客以4比0大勝摩爾多瓦，創出7戰7勝佳績，成為歐洲區唯一保持全勝嘅球隊，丹麥只要喺周三(13日)凌晨主場擊敗奧地利，就可以提早取得明年世界盃決賽周入場券。

丹麥喺今年歐國盃經歷地獄與天堂，首場分組賽有主將基斯甸艾歷臣因為心臟問題暈倒，幾乎冇命，球隊亦連輸2場瀕臨出局，但之後突然發威殺入4強，令人驚喜。

丹麥踢世界盃外圍賽就順風順水好多，今場憑安達斯奧臣、卡積亞、基斯甸洛加特、米希利各入1球，大勝摩爾多瓦4比0，丹麥唔止7戰全勝，而且合共攻入26球兼不失球，表現簡直無懈可擊。

丹麥現時領先同組第2位蘇格蘭7分，剩下3輪賽事，只要下場擊敗奧地利，或者蘇格蘭不敵法羅群島，丹麥就可以出線。