英格蘭甩轆失分 最佳球員基亞利殊被換勁忟

2021年10月13日 12:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
英格蘭周三(13日)凌晨世盃外歐洲區I組,主場出擊對匈牙利只能踢成1比1平手,依家只係領先次席波蘭3分,出線資格仍未穩陣。英格蘭今場進攻乏力,唯一有好表演嘅進攻球員基亞利殊,竟然喺62分鐘率先被換走,搞到呢位曼城球星非常忟憎。
英格蘭今場盡遣哈利卡尼、史達寧、基亞利殊、菲爾科頓同美臣蒙特5大攻擊球員,不過表現就令人失望,24分鐘勞基梳爾禁區內犯規輸12碼,路蘭沙拉爾操刀為匈牙利領先;英格蘭37分鐘由基亞利殊開罰球,由史東斯喺門前混戰追成平手。英格蘭追平後無以為繼,最終只能踢成1比1平手。
英格蘭進攻失靈,箭頭哈利卡尼踢到隱形,球隊所有攻勢幾乎都由基亞利殊策動,每次拎到波都獲主場球迷吶喊,但修夫基喺62分鐘首度換人,就係將基亞利殊換走,呢位曼城球星見到亦難以置信,不斷搖頭表示唔同意,返到後備席更抱頭勁失望,球迷亦對修夫基嘅換人表示質疑。
修夫基賽後亦批評球隊表示:「令人失望嘅演出,我哋踢唔出應該有嘅水平,球員交失咗好多波,跑又唔夠人跑,球隊嘅平衡出現問題,我唔認為要深究個別球員,依家係成隊波都踢唔出水準。」