36歲法芬迎國家隊100戰：與美斯交手已無憾

足球博彩神器，每日重心提供盡在《彩報》：http://win.on.cc/football/　

周五(15日)早上世界盃外圍賽南美洲區，阿根廷將於主場迎戰秘魯，對於秘魯名將法芬而言，今場意義重大，因為將會係呢位翼鋒第100次為國家隊上陣，由於法芬已經36歲，相信踢埋今屆外圍賽，就會退出國際賽舞台，能夠喺「百戰」遇上美斯，絕對係最佳紀念賽。

法芬、比沙路、荷西古里路被稱為「秘魯三寶」，3人球員生涯都非常長，比沙路踢到42歲先至掛靴，37歲嘅荷西古里路、36歲嘅法芬仍然繼續為國出征，早前世盃外秘魯擊敗智利，射手荷西古里路傷出，正係由法芬入替佢，由於荷西古里路已經因傷退隊，法芬今場好大機會披甲，迎接國家隊100戰。

曾經效力燕豪芬、史浩克04年嘅法芬為秘魯射入27球，僅次於荷西古里路，佢今年返回秘魯聯賽搵食，承認球員生涯已近尾聲，踢埋今屆世界盃外圍賽後，應該會退出國家隊，秘魯現時排第7位，出線機會渺茫，法芬要把握所餘無幾嘅機會踢好波，同美斯大鬥法。