曼城鎖定21歲神鋒 冬季5.4億搶購

2021年10月14日 08:01
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
上季英超冠軍曼城今夏原本對收購熱刺射手哈利卡尼胸有成竹,但最後卻功敗垂成,搞到依家焗踢無鋒陣,領隊哥迪奧拿吸取教訓之後,不敢再怠慢,準備好等明年1月冬季轉會市場重開之後,立即斥資6,000萬歐元(約5.4億港元)收購費倫天拿21歲天才射手杜辛華荷域。
曼城今季仍然可以創造大量攻勢,但臨門一腳卻往往失諸交臂,反映欠缺1位正宗射手嘅弊病,如果今季想成功衞冕英超,甚至奪取歐聯冠軍,冬季簽入射手,絕對刻不容緩。
由於曼城原本2位目標人物哈利卡尼、艾寧夏蘭特都冇可能季中加盟,所以「藍月亮」將目標轉移至杜辛華荷域。呢位塞爾維亞國腳上季嶄露頭角,為費倫天拿上陣37場聯賽入21球,排射手榜第4位。
身高1米90嘅杜辛華荷域唔止制空力強,衝得撞得,而且有不俗腳法,被指似費倫天拿經典射手東尼,絕對係難得嘅中鋒材料。
杜辛華荷域今季愈戰愈勇,為費倫天拿上陣8場入6球及1次助攻,日前世界盃外圍賽塞爾維亞對盧森堡、阿塞拜疆,杜辛華荷域合共轟入3球,協助塞爾維亞2連勝,並力壓葡萄牙,排歐洲區A組榜首。
由於費倫天拿財力欠佳,近年不時出售主力,包括將2位天才新星貝拿迪斯治、費達歷高基艾沙賣畀祖雲達斯,曼城今次出價6,000萬歐元買杜辛華荷域,相信費倫天拿唔介意季中就放人。