逃離「魔」掌　羅美路加盟威尼斯

足球博彩神器，每日重心提供盡在《彩報》：http://win.on.cc/football/　

今夏遭曼聯放棄嘅阿根廷門將羅美路終於有班落，重返意甲，以自由身加盟新升班球隊威尼斯，簽約至明年夏天。現年34歲嘅羅美路深信自己仍然有能力喺歐洲主要聯賽立足，今季目標要協助威尼斯保住意甲席位。

羅美路對於意甲並唔陌生，佢曾於2011至15年效力森多利亞，其後轉投曼聯，可惜只能長期擔任後備，佢為紅魔鬼上陣61次，但當中僅7次係英超比賽，其餘都係盃賽，上季更加連1次上陣機會都冇。

羅美路早於年初已經想走人，但遭曼聯阻撓，直至今夏滿約先至可以離隊。原本有傳羅美路會去美職或者返阿根廷搵食，但佢最終揀留喺歐洲。

威尼斯今季升上意甲後，成績欠佳，7場聯賽僅1勝2和4負，失咗12球，相信羅美路加盟之後，有大把機會表現身手。同埋近年唔少曼聯球員去意甲搵食，都有好表現，羅美路或者可以搵到事業第二春。