2場吞7蛋 卡塔爾真係令世界盃嘥咗個位

2021年10月14日 14:05
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
明年世界盃決賽周將於卡塔爾舉行,呢支中東球隊身為主辦國唔需要踢外圍賽,趁國際賽檔期約戰其他球隊踢熱身賽,但繼日前吞葡萄牙3蛋之後,周三(13日)再以0比4大敗於愛爾蘭腳下,表現完全唔入流,恐怕會喺決賽周出醜成為「三零部隊」。
卡塔爾2019年喺亞洲盃決賽擊敗日本,首次成為亞洲冠軍,當全世界以為佢哋將會強勢迎戰世界盃,點知今年表現每況愈下,近6場比賽只取得1和5負,唯一和波對手只係魚腩球隊盧森堡。
至於今個月2場熱身賽,卡塔爾0比3不敵葡萄牙,對手有球王C朗,算情有可原,但上場吞愛爾蘭4蛋,就真係好離譜,卡塔爾世界排名43位,比愛爾蘭高7位,但卻毫無還撃之力,卡塔爾全場只有2次射門,都唔中目標,認真失禮。
臨時演員都係演員,熱身賽都係比賽,但卡塔爾球員卻毫無鬥心,缺乏應有專業態度,影衰主辦國身份,實在令人失望。
卡塔爾主帥菲臘斯山齊士曾經於1996至2006擔任巴塞隆拿青年軍教練,跟住去卡塔爾搵食,教過卡塔爾U19及U23,以呢位45歲少帥嘅教波資歷,恐怕難以帶領球隊扭轉乾坤。
卡塔爾之前從未打入世界盃決賽周,當年更被指賄賂國際足協官員,先至奪得世界盃主辦權,成為球壇醜聞。
用錢或者可以買到主辦權,但錢唔可以代替球員上陣比賽,明年11月世界盃決賽周開波,卡塔爾只能自求多福,避免成為「最醜怪」東道主。