鋼門開刀抖10周　A米急簽38歲老將救亡

最強博彩盤路過關神器《串績王》：http://win.on.cc/football/　

AC米蘭宣布正選門將邁治蘭受傷，已經接受咗手術，需要休息10星期，預料呢段日子將會由2號門將達泰魯辛奴把關，會方同時簽入38歲門將米蘭迪，以備不時之需。

據悉邁治蘭左手腕韌帶受傷，需要開刀治療傷勢，預料10星期之後應該可以復出。呢位26歲法國國腳今夏由里爾轉投AC米蘭，代替離隊嘅基安盧基當拿隆馬，並有出色表現，佢今次長抖，對球隊造成沉重打擊。

AC米蘭後備門將達泰魯辛奴上年9月由里昂來投，但上季各項賽事僅上陣5次，當中只有1場係意甲，表現仲有待觀察，所以會方簽入米蘭迪，呢位老將曾經效力祖雲達斯、帕爾馬、博洛尼亞、羅馬等意甲球隊，經驗豐富，隨時比達泰魯辛奴更可靠。