95%出場率！曼聯揸乾般奴費南迪斯

最強博彩盤路過關神器《串績王》：http://win.on.cc/football/　

曼聯中場般奴費南迪斯可以話係近年球壇「最辛勞球員」，根據世界職業足球協會(FIFpro)最新報告顯示，呢位葡萄牙國腳係上季其中1位被球會用得盡嘅球員，幾乎每場都要上陣。

般奴費南迪斯2020年1月由士砵亭加盟曼聯之後，20個月內已經為紅魔鬼上陣90次，其中上季38場英超，佢僅獲輪休1場，並踢晒6場歐聯分組賽，另外再踢9場歐霸盃。

般奴費南迪斯上季仲為曼聯踢3場英足盃及3場英聯盃，總結曼聯全季61場比賽，般費踢咗58場，出場率達95%。

呢種情況今季仍然冇改變，曼聯上場英超對愛華頓，領隊蘇斯克查畀C朗、保羅普巴做後備休息，但仍然要般奴費南迪斯踢足全場，簡直想揸乾佢。