拜仁啟動簽夏蘭特大計　羅拔佬成犧牲品

最強博彩盤路過關神器《串績王》：http://win.on.cc/football/　

德國《圖片報》爆料，指德甲豪門拜仁慕尼黑高層已經開始討論收購多蒙特前鋒艾寧夏蘭特嘅計劃，並準備放棄射手羅拔利雲度夫斯基，呢位33歲波蘭國腳或被逼明夏離隊，有傳曼城同巴黎聖日耳門都有意簽佢。

羅拔利雲度夫斯基將於2023年夏天約滿，但會方仍然未打算同佢續約，令呢位老將非常不滿，原來拜仁高層已經計劃緊收購艾寧夏蘭特，取代羅拔佬，畢竟羅拔佬已經33歲，球隊都係時候為鋒線換班，21歲嘅艾寧夏蘭特唔止年輕，而且入球率極高，絕對係取代羅拔佬嘅最佳人選。

據悉，拜仁方面計算緊收購艾寧夏蘭特嘅費用，當中轉會費可能達到7,000萬歐元，仲要向呢位挪威國腳提供3,000萬歐元年薪，同時亦要向佢嘅經理人拉奧拿支付3,000萬至4,000萬歐元佣金，仲要畀艾寧夏蘭特嘅爸爸一筆佣金，簽入夏蘭特嘅代價非常大，但為咗保持球隊競爭力，都在所不惜。