末段連失2球 曼聯不敵「狐狸」

20211016
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周六(16日)晚英超賽事,李斯特城主場迎戰曼聯。「紅魔鬼」在領先1球優勢下連番失守,最終以2比4敗陣,自去年1月保持至今嘅聯賽作客不敗紀錄被中止,近3場聯賽1和2負,嚟緊仲要應付魔鬼賽程,曼聯呢鑊點死?
曼聯於19分鐘先開紀錄,格連活特喺右邊攞波後內切推順勁射,皮球直飛遠柱中內柱彈入冇得救,曼聯領先1比0。不過轉個頭後邊就輸個戇居波,曼聯喺自己禁區頂互搓,克服傷患上陣嘅哈利馬古尼企喺左邊線等波踢,卒之畀伊恩拿祖搶到個波,泰利文斯禁區角接應,第一時間熨個遠柱波笠入死角,門將迪基亞得個睇字,李斯特城扳平1比1。
力爭正選嘅C朗拿度冇乜波掂,但一掂就有威脅,佢喺上半場較後時間一腳勁射被擋出,另一次攻勢出埋倒掛,不過畀對方後衞頂住唔成功,半場打和1比1。
曼聯被追和後一直受壓,戰至下半場65分鐘,拉舒福特入替查頓辛祖,係佢自歐國盃結束後首度登場,期間佢接受肩膊手術,終於康復披甲。75分鐘泰利文斯禁區頂勁射中柱。
賽事其後風雲色變,蘇恩古把握角球製造混亂門前射入,為李斯特城領先2比1,4分鐘後拉舒福特單刀破網,復出後立即入波,曼聯扳平2比2。不過中圈再開,占美華迪立即為主隊門前勁射破網,「狐狸」再度領先3比2,補時階段曼聯鬆散防線再失守,達卡錦上添花,李斯特城最終贏4比2,全取3分。