伊卡迪被爆偷食!攞命夫妻分手網民心涼
最強博彩盤路過關神器《串績王》:http://win.on.cc/football/ 
法國媒體周日(17日)爆出驚人消息,巴黎聖日耳門前鋒莫路伊卡迪懷疑「偷食」,老婆兼經理人娜立喺社交網怒轟:「為咗個蕩婦摧毀另一個家庭」,而且仲即時刪除社交網內所有同莫路伊卡迪嘅合照兼取消關注。由於莫路伊迪迪當年被指「勾義嫂」,喺阿根廷隊友手上搶走娜拉,而且2人作風高調惹人反感,唔少網民都話對2人分手覺得「心涼」。
據法國媒體《GFFN》爆料,莫路伊卡迪近日搭上阿根廷女星Maria Eugenia Suarez,呢位29歲演員今年8月先至同老公離婚,而娜拉喺社交網所指「摧毀另一個家庭」,令人懷疑莫路伊卡迪再做第3者拆散人哋家庭。莫路伊卡迪喺2013年,被爆搶走阿根廷同胞兼森多利亞隊友麥斯盧比斯嘅老婆娜拉,而且仲喺2014年閃電結婚,當時唔少球迷都鬧爆2人係「奸夫淫婦」,甚至有傳美斯都為好友麥斯盧比斯出頭,喺國家隊排斥莫路伊卡迪。
娜拉嘅炮轟雖然冇指名道姓,不過著名娛樂記者Ker Weinstein隨後就公開佢同娜拉嘅聊天紀錄,當中娜拉表示:「我哋分咗手啦!」Ker Weinstein就回應:「支持你,我會畀你力量!」娜拉近年做埋莫路伊卡迪嘅經理人,佢喺2019年離開國際米蘭轉會巴黎聖日耳門前,娜拉就被指係破壞國米同伊卡迪續約談判嘅人,令唔少球迷對佢非常反感。