昔日對手踩多腳：蘇帥再冇冠軍等炒

足球博彩神器，每日重心提供盡在《彩報》：http://win.on.cc/football/　

曼聯反輸畀李斯特城，除咗哈利馬古尼成為箭靶，領隊蘇斯克查用人同排陣都備受爭議，足球評述基昂仲要補多腳，佢話如果曼聯今季冇冠軍，蘇斯克查勢必落鑊。

基昂效力阿仙奴期間同蘇斯克查做過對手，依家唔同崗位，對住蘇帥一樣唔客氣：「我覺得曼聯今季需要做啲嘢，如果佢哋今季仲贏唔到冠軍，蘇斯克查亦冇得留低。」

佢仲話：「我哋講緊嘅曼聯，係一定要捧盃嘅，佢哋將近10年冇贏過英超，如果今季仲係食白果，球會壓力將會更大。」

講到曼聯人腳配搭，基昂都話睇唔通：「佢哋有啲似林柏特執教嘅車路士，需要解決中場平衡問題，我有睇普巴踢歐國聯，佢踢墮後中場踢得好好，但喺曼聯就做唔到同樣嘅事，佢哋需要解決中場問題，為前場嘅天才製造機會。」