【官宣】「美斯接班人」安素法迪續約巴塞！

足球博彩神器，每日重心提供盡在《彩報》：http://win.on.cc/football/　

巴塞隆拿今夏失去「球王」美斯後，球隊正為重建之路做準備，繼早前柏迪續約後，另一拉馬西亞青訓球星安素法迪亦落實續約，呢位「新10號」喺歐聯對基輔戴拿模前，正式同巴塞隆拿續約至2027年6月，違約金定為10億歐元。

18歲嘅安素法迪上年重傷長抖10個月，上個月先至傷愈復出，繼承美斯10號波衫嘅佢被寄以厚望，對基輔戴拿模一仗佢半場後備上陣，但係表現一般，更有一次黃金機會冇交波而選擇自己射門，錯失入球機會。

巴塞教練朗奴高文賽後就為安素法迪減壓：「今場表現證明安素法迪仲欠缺一啲元素，呢個係好正常，唔好忘記佢仲係得18歲，要佢解決美斯留低嘅所有問題係唔可能，而且佢養傷咁長時間，係需要慢慢恢復。」