足球博彩神器，每日重心提供盡在《彩報》：http://win.on.cc/football/　

利物浦嘅續約行動已經八八九九，中後場各要員都續晒長約，嚟緊就輪到三箭頭「埃及文明」穆罕默德沙拿、沙迪奧文尼及羅拔圖法明奴，意大利《米蘭體育報》報道，紅軍三箭頭最先續約將會係沙拿，年薪係破紀錄嘅2000萬歐元。

「埃及文明」3人合約同時於2023年到期，即係話踢埋今季，明年3人齊齊進入合約年，可以同歐洲各豪門傾自由轉會，有消息指皇馬打算用現金加夏薩特收購沙拿，反映出沙拿畀豪門吼實，利物浦再唔同沙拿續約，過多兩年就會重演韋拿杜姆事件，人財兩失，球隊成績更因為合約問題受影響。

《米蘭體育報》報道，利物浦與沙拿即將續約，新合約延長至2025年，年薪大幅升至2000萬歐元，折合周薪上升至38萬歐元，創下紅軍隊史紀錄，據講沙拿對新約條件好滿意，將於稍後簽約作實。