同美斯好夾 皇馬擔心麥巴比唔捨得走

20211022
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
皇馬一直打住如意算盤,等出年夏天基利安麥巴比同巴黎聖日耳門約滿,可以免費簽入該位法國前鋒,但事件可能有變,西班牙傳媒報道,皇馬愈嚟愈擔心計劃失敗,主要原因係麥巴比同美斯開始建立默契,令佢留隊續約。
上仗歐聯賽事,聖日耳門在落後1比2劣勢下反勝RB萊比錫,美斯同麥巴比配合絲絲入扣,展示球王級合作嘅威力,兩人開始建立默契,此事對皇馬嚟講係壞消息,皇馬季初出價1.8億歐元天價收購麥巴比,但聖日耳門不為所動,本來皇馬都唔急,因為麥巴比合約只餘1年,明夏回復自由身將可免費簽佢,但依家唔到佢哋唔驚。
早前《隊報》發布麥巴比專訪,講到今夏曾向會方申請離隊,但唔成功,後來美斯加盟,麥巴比亦冇再提離隊嘅事,似乎會重新考慮同聖日耳門續約。
另方面,麥巴比阿媽與聖日耳門總監見面,佢建議阿仔等埋2024巴黎奧運先走,如果麥巴比聽阿媽話,皇馬就要等多3年。
除咗上述因素,巴塞隆拿亦搞搞震,《阿斯報》報道,巴塞為阻止皇馬簽入麥巴比,打算加入競逐行列,向麥巴比提供9000萬歐元簽字費,傳媒認為巴塞根本冇錢,麥巴比加盟巴塞機會不大,但就有抬價作用,令皇馬簽入麥巴比過程中要付出更高代價。