美臣蒙特弗爆戴帽 車仔劏雀開主其他

2021年10月23日 21:20
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周六晚(23日)英超頭場,車路士雖然有箭頭盧卡古同迪姆華拿因傷倦勤,但有美臣蒙特大演帽子戲法兼有助攻,喺主場狂數「金絲雀」諾域治7:0,開出13倍嘅主其他,續居榜首。
車仔兩大前鋒盧卡古與迪姆華拿,於周中歐聯大勝馬模4粒之役傷出,今仗齊齊缺陣,但主帥杜曹賽前講明未驚過,改用夏維斯打中鋒,配合美臣蒙特同赫臣奧杜爾支援,面對包尾大幡諾域治游刃有餘。開波僅8分鐘,美臣蒙特遠射得手,極速打開紀錄,10分鐘高華錫靚直線劏穿晒「金絲雀」防線,畀左路嘅赫臣奧杜爾熨射遠柱破網,完半場前美臣蒙特妙傳列斯占士挑射成3:0。
易邊後車仔未有留手。57分鐘高華錫交畀空晒嘅芝維爾勁射整多粒,亦係呢位左翼衞連續3場聯賽有士哥。5分鐘後赫臣奧杜爾左路橫傳,諾域治右閘麥斯艾朗斯擺烏龍,冇耐仲有賓吉遜剷低列斯占士,搞到2黃1紅被逐,打少個更加難打,其後車仔更博到12碼,雖然美臣蒙特操刀被告魯爾救出,但因告魯爾雙腳冇貼住龍門線而需重射,美臣蒙特今次冇甩拖,完場前佢接應羅夫度斯卓克橫傳射成7:0,個人大演帽子戲法,締造今季英超開咧至今最大比數勝仗,依家9戰累積22分,續居榜首。