反勝內幕　C朗半場鬧隊友「不知羞恥」

足球博彩神器，每日重心提供盡在《彩報》：http://win.on.cc/football/　

「你哋知唔知羞恥？喺主場球迷面前，如此表現絕對不能接受！」上述對白，係曼聯上周中歐聯主場對阿特蘭大，半場返入更衣室時C朗向全隊訓話講嘅，結果曼聯喺半場落後2球劣勢下連入3球，熱血反勝3比2，C朗再次拯救曼聯。

曼聯一名知情人士向英國傳媒爆料，講番上場反勝內幕，就係全靠C朗半場發火，情況恍如傳奇領隊費格遜向球員「吹風筒」，佢鬧爆球員不知羞恥，之後繼續鬧：「喺主場球迷面前踢成咁，絕對不能接受，如果今場贏唔到，我哋就無法喺分組賽晉級。」

其實除咗C朗，領隊蘇斯克查同中場般奴費南迪斯都有出聲，但就冇C朗鬧得咁到位，蘇帥指出，曼聯仲未輸，但必須團結，並盡快爭取入球；至於般奴就提議改變踢法，畀自己墮後攞波，策動攻勢。

經過C朗一鬧，曼聯嘅潛力激發出嚟，絕地反勝阿特蘭大，不過嚟緊紅魔鬼仲有更大挑戰，就係周日晚惡鬥死敵利物浦，曼聯嘅氣勢能否延續？