沙維2年奪7冠　巴塞很想要吧

最強博彩盤路過關神器《串績王》：http://win.on.cc/football/　

卡塔爾酋長盃決賽，由巴塞隆拿名宿沙維執教嘅艾薩德喺法定時間同艾雷恩打和1比1，需要互射12碼分勝負，最終艾薩德贏5比4，奪得冠軍，亦係沙維執教艾薩德2年以來，第7項冠軍，相信近年陷入低谷嘅巴塞隆拿，依家更加渴望沙維回巢救亡。

今場可以話係「夢幻決賽」，艾薩德唔止有沙維領軍，仲有前西班牙國腳辛迪卡索拉助陣。至於艾雷恩由法國名帥白蘭斯執教，佢球員時代都踢過巴塞隆拿，早前加盟艾雷恩嘅哥倫比亞球星占士洛迪古斯正選上陣。

臨完上半場前，艾雷恩獲得12碼，由巴謙美主射入網，換邊之後，輪到艾薩德博到12碼，由辛迪卡索拉射入扳平1比1。最後需要互射12碼分勝負，艾雷恩後衞卡利薩迪射失，艾薩德5射全中勝出捧盃。

沙維執教艾薩德2年以來，協助球隊奪得1次聯賽冠軍，2次卡塔爾盃冠軍、1次卡塔爾超級盃冠軍，2次卡塔爾酋長盃冠軍，1次卡塔爾星盃冠軍，簡直係人生大贏家，難怪外界一直認為只有沙維先至可以拯救到巴塞隆拿，令佢成為巴塞下任主帥大熱。