普巴「黑色15分鐘」　史高斯：冇資格再上陣

足球博彩神器，每日重心提供盡在《彩報》：http://win.on.cc/football/　

曼聯喺主場0比5輸畀利物浦，場上「戰犯」當然有排捉，不過法國中場保羅普巴賽後就成為最大箭靶，佢後備上陣只係14分鐘時間，已經製造1個失波同拎1張紅牌，曼聯名宿史高斯都忍唔住怒轟，指保羅普巴冇資格再為曼聯上陣。

曼聯踢45分鐘已經輸0比4，半場期間蘇斯克查換入保羅普巴，希望可以穩定局面，但佢一落場就喺中場失波，被利物浦打反擊輸到第5球，之後更因為粗野飛鏟拿比基達直接食紅牌，拿比基達亦被擔架抬出場，保羅普巴只係落場15分鐘就搞出大頭佛。

史高斯賽後表示：「曼聯搵佢落場，希望輸得唔好咁難睇，結果佢一嚟就送對手1球，之後仲因為一次離晒譜嘅攔截，令曼聯輸0比5仲要10人應戰。如果蘇斯克查仍然係領隊，保羅普巴仲會唔會有得踢？大家都知佢好波，但佢嘅魯莽行為、續約跳草裙舞等等，我唔覺得冇咗佢會係咩損失。普巴成日話自己冇穩定上陣機會，但今場表現完全係對領隊同隊友嘅唔尊重！」