細佬仲好波　杜根夏薩特入2球拯救多蒙特

最強博彩盤路過關神器《串績王》：http://win.on.cc/football/　

周三(27日)凌晨德國盃第2圈，多蒙特主場對德乙包尾球隊恩高斯達特，一度老鼠拉龜，無從入手，幸好有杜根夏薩特扮演救世主，後備上陣10分鐘內連入2球，協助多蒙特贏2比0晉級。

由於對手比較弱，德甲2哥多蒙特今場派出多位副選上陣，估唔到遇到恩高斯達特頑強抵抗，攻極都唔入，結果要等到杜根夏薩特上陣，先至打破僵局。呢位28歲比利時國腳71分鐘入替梅尼亞，佢上陣僅1分鐘就入波，踢到81分鐘再射成2比0。值得一提，杜根夏薩特2個入球都係來自祖利安白蘭特右路傳中，2人好有默契。

杜根夏薩特係皇馬球星夏薩特嘅二弟，曾經一齊效力車路士，但係杜根不受重用，輾轉去德甲搵食，先後效力慕遜加柏、多蒙特，上季協助多蒙特奪得德國盃冠軍。

事實上，杜根夏薩特近年喺球場上嘅表現更勝大佬夏薩特，包括今屆歐國盃16強，射入全場唯一入球，協助比利時擊敗衞冕嘅葡萄牙，打出屬於自己嘅名堂。