史達寧破入球荒　曼城大勝反壓PSG上榜首

足球博彩神器，每日重心提供盡在《彩報》：http://win.on.cc/football/　

周四(4日)凌晨歐聯分組賽A組，曼城主場出擊以4比1大勝布魯日，英格蘭國腳史達寧更打破2個半月(共31場比賽)嘅入球荒，由於同組大敵巴黎聖日耳門(PSG)作客被RB萊比錫逼和2比2，曼城得以超前升上榜首。

曼城今場贏得輕鬆，菲爾科頓15分鐘先開紀錄，雖然2分鐘後史東斯擺烏龍幫客隊追和，但「藍月亮」下半場撻着即連入3球，馬列斯、史達寧同加比爾捷西斯各建一功，史達寧更係自8月中以來首次入波，喺周六(6日)「曼市打吡」對曼聯前打破入球荒。

同組PSG作客RB萊比錫鬥得激烈，開波8分鐘PSG就被倒戈嘅尼干古攻陷先落後，4分鐘後再輸12碼，全靠基安盧基當拿隆馬救出安達施華射門先不至多失；大難不死嘅PSG完半場前由韋拿杜姆連入2球反超前，不過去到第92分鐘，PSG再輸12碼，今場蘇保斯拉爾操刀命中，兩隊踢成2比2各得1分。