雲迪碧克宣布做爸爸　英超經典水貨寸爆

最強博彩盤路過關神器《串績王》：http://win.on.cc/football/　

荷蘭中場雲迪碧克上年加盟曼聯後，發展一直好唔暢順，今季英超更只踢過5分鐘時間，不過呢位24歲球星場外傳出喜訊，周四(4日)宣布老婆Estelle懷孕，雲迪碧克將會榮升做爸爸。不過，前荷蘭國腳雲達美迪就突然出嚟抽水，問雲迪碧克會唔會將BB改名做「Ole Gunnar」(蘇斯克查名字)。

雲迪碧克老婆Estelle係荷蘭傳奇柏金個女，當年柏金效力阿仙奴嗰陣，Estelle就喺倫敦出世，今次佢同雲迪碧克生BB，「小雲」會喺邊度出世都係未知數，事關雲迪碧克被傳會喺1月份轉會，離開曼聯尋找上陣機會。

雲迪碧克喺社交網宣布喜訊後，前荷蘭國腳雲達美迪突然出嚟抽水，佢留言表示：「恭喜晒！BB個名會唔會叫Ole Gunnar？」擺明寸雲迪碧克畀「仇人」蘇斯克查冷落。其實雲達美迪本身就係英超史上其中一個經典「水貨」，2005年由國際米蘭轉會愛華頓後，踢咗4年只係上陣過20場聯賽，而且1球波都入唔到，仲衰過雲迪碧克。