美斯缺陣　尼馬做英雄入2球助PSG險勝

足球博彩神器，每日重心提供盡在《彩報》：http://win.on.cc/football/　

周日(7日)凌晨法甲，巴黎聖日耳門(PSG)缺少養傷嘅球王美斯，幸好仲有「二哥」尼馬發威，個人梅開二度，協助PSG作客以3比2擊敗波爾多，呢位巴西球星狀態大勇，美斯可以放心休息。

尼馬今場大顯身價，開波3分鐘就有1次妙傳，可惜韋拿杜姆頭槌攻門高出，踢到29分鐘，尼馬自己嚟，喺禁區內使出幾下假動作之後，勁射入網，打破近2個月聯賽入球荒，亦係佢職業生涯第400個入球。

臨完上半場，基利安麥巴比後腳妙傳，尼馬射成2比0，尼馬今場唔止入2球，仲有4次妙傳及5次過人，表現非常精彩。

換邊之後，韋拿杜姆「單刀橫傳」，由基利安麥巴比射入空門，PSG領先3球之後，表現明顯有所鬆懈，被波爾多前鋒艾貝利艾利斯、麥巴耶尼安射入，追至2比3，PSG即使贏波，但球員精神唔夠集中，真係要檢討。