羅馬孖寶受傷　考起意軍主帥文仙尼

最強博彩盤路過關神器《串績王》：http://win.on.cc/football/　

意大利將於11月13日凌晨世界盃外圍賽生死戰，主場對瑞士，意軍受到傷兵問題困擾，2位效力羅馬嘅進攻猛將羅倫素柏歷堅尼、尼高路辛尼奧路受傷退隊，領隊文仙尼補選拉素中場卡達迪、阿特蘭大中場馬迪奧比辛拿。

羅倫素柏歷堅尼受膝傷問題困難，至於尼高路辛尼奧路小腿有傷，當中以羅倫素柏歷堅尼缺陣對意大利影響最大，呢位羅馬隊長今季表現出色，踢9場意甲入5球，並喺上月歐國聯對西班牙，射入1球，佢今次因傷退隊，令文仙尼喺進攻組合選擇減少。

至於獲補選嘅馬迪奧比辛拿喺今屆歐國盃有2球進帳，表現令人驚喜，但係佢剛傷愈，狀態成疑。另一位獲補選嘅中場卡達迪從未為意大利上陣，預料作用不大。

意大利現時喺歐洲區C組同瑞士同分，兩軍今次正面交鋒，對於小組首名直接出線資格誰屬有關鍵性影響。意大利對完瑞士之後，將於11月16日凌晨踢最後1場外圍賽對北愛爾蘭。