太過分啦　阿根廷要美斯帶傷上陣

最強博彩盤路過關神器《串績王》：http://win.on.cc/football/　

巴黎聖日耳門(PSG)球王美斯近期受傷患問題困擾，但阿根廷國家隊主帥史卡朗尼仍然徵召佢入伍，並要求呢位34歲前鋒帶傷上陣，踢嚟緊2場世界盃外圍賽對烏拉圭及巴西，隨時令美斯傷上加傷。

美斯喺上月尾法甲PSG對里爾一役受傷之後，已經缺陣2場比賽，包括錯過歐聯對RB萊比錫、法甲對波爾多。據悉美斯左膝及左腿筋嘅傷勢仍然未痊愈，但史卡朗尼考慮到對手烏拉圭及巴西實力強橫，仍然決定徵召美斯助陣，當時已經引起PSG總監李安納度不滿。

阿根廷著名足球記者維羅尼卡更加爆料，指史卡朗尼已經決定派美斯上陣踢呢2場大戰，至於會安排佢踢幾多分鐘，仲要視乎情況而定，相信PSG管理層知道之後，肯定更加火滾。

阿根廷現時排南美洲區第2位，落後榜首巴西6分，但領先第5位烏拉圭9分，兼踢少1場，以前4位直接出線嘅機會高唱入雲，其實並冇必要美斯帶傷上陣。