【官宣】謝拉特正式執教維拉！再戰英超

最強博彩盤路過關神器《串績王》：http://win.on.cc/football/　

利物浦傳奇球星謝拉特回歸英超！上季帶領格拉斯哥流浪重奪失落10年蘇超冠軍嘅謝拉特，周四(11日)突然現身倫敦，佢此行係同阿士東維拉簽約，日內正式接掌帥印，結果周四下午維拉正式官方宣布，謝拉特出任領隊一職。據報維拉將會向格拉斯哥流浪支付300萬鎊賠償金，如無意外下周主場對白禮頓會首度領軍。

維拉經歷英超5連敗後，早前宣布將領隊甸恩史密夫炒魷，謝拉特立即成為球隊頭號目標，專門報道格拉斯哥流浪消息嘅媒體《The Ibrox Channel》周四公開影片，謝拉特拎住小行李喼抵達倫敦，將會去維拉班主梳利斯位於當地嘅辦公室簽約，多個英國媒體都證實協議已經達成，只待文件處理就可以落實，其後維拉作出官宣。

現年41歲嘅謝拉特，同格拉斯哥流浪仲有2年半合約，據報維拉將會支付300萬鎊賠償金，同時會將佢喺流浪嘅副手比亞利，以及多名教練一齊帶去新球會。報道指謝拉特願意執教維拉，最大原因係維拉行政總裁佩斯路，佩斯路之前亦曾擔任利物浦行政總裁，同謝拉特早已建立密切關係。

謝拉特2015年離開利物浦後，曾去美職踢洛杉磯銀河1季先至掛靴，退休後曾經重返利物浦執教青年軍，2018年就成為格拉斯哥流浪領隊，上季帶領球隊重奪蘇超冠軍。謝拉特今次回歸英超，未來4場對手係白禮頓、水晶宮、曼城同李斯特城，12月11日就會去晏菲路倒戈利物浦，勢成球迷焦點。