紐卡素斟尼敦阿基　VVD力撐荷蘭隊友

足球博彩神器，每日重心提供盡在《彩報》：http://win.on.cc/football/　

荷蘭喺世盃外對挪威嘅生死戰前，正選中堅迪維積受傷退隊，不過領隊尹戈爾就唔作出補選，事關陣中仍有馬菲斯迪歷特、尼敦阿基同戴利白蘭特等球員可以頂上，其中效力曼城嘅尼敦阿基雖然今屆仲未落過場，但據聞獲得紐卡素垂青，有望1月轉會。

荷蘭中堅華基爾雲迪積克上個月受訪，曾經大讚尼敦阿基係「最被低估」球員，呢位用波型中堅今季喺曼城上陣機會唔多，至今只係踢過3場英超，不過據英國傳媒報道，紐卡素正準備向曼城提出收購，希望1月轉會窗將佢帶去聖占士公園。

紐卡素領隊艾迪侯域對尼敦阿基非常熟悉，呢位26歲中堅之前喺般尼茅夫打出名堂，正正就係艾迪侯域一手栽培，由於佢喺曼城嘅排位喺拿樸迪、魯賓戴亞斯同史東斯之後，估計「藍月亮」亦唔會對放人有太大問題，尼敦阿基如果可以成功轉會，有助佢爭奪荷蘭正選席位。