羅美路受傷　干地翻生大計受打擊

足球博彩神器，每日重心提供盡在《彩報》：http://win.on.cc/football/　

阿根廷喺世盃外打和巴西後成功出線，不過中堅基斯甸羅美路今場受傷，就令熱刺領隊干地非常頭痛。今夏登陸英超嘅基斯甸羅美路係干地3中堅陣式嘅核心，今仗佢疑似拉傷大腿，預計可能要抖幾個星期，對干地嘅重建大計造成極大打擊。

阿根廷今場由基斯甸羅美路同奧達文迪鎮守中路，表現相當穩健，不過下半場開始冇耐，基斯甸羅美路被馬菲亞斯根夏放甩後，用超技術將佢攔跌，食黃牌之餘仲搞到自己受傷，基斯甸羅美路接受軍醫治療後一度想返入場比賽，但最終都頂唔住被換走。

據報基斯甸羅美路可能係左腳大腿肌肉拉傷，星期一(22日)凌晨主場對列斯聯一仗好大機會缺陣，佢係干地喺熱刺3中堅嘅首席人選，如果佢養傷嘅話，達雲臣山齊士、賓戴維斯同艾歷迪亞就要暫時頂住，但未能畀到球迷信心。