曼聯球星人工曝光　每年薪酬開支暴升23%

足球博彩神器，每日重心提供盡在《彩報》：http://win.on.cc/football/　

英超勁旅曼聯周三(17日)公布季度財政報告，雖然喺觀眾重新入場下錄得1.265億鎊盈利，不過最令球迷注意嘅係球會薪酬開支，隨住C朗拿度、華拉尼同查頓辛祖加盟，曼聯嘅薪酬支出比上年暴升23.1%，每年薪酬總支出高達3.54億鎊！

英國《太陽報》報道，曼聯目前陣中周薪超過20萬鎊嘅球員多達8人，今夏加盟嘅C朗(48萬鎊周薪)、查頓辛祖(35萬鎊周薪)、華拉尼(34萬鎊周薪)都位列高薪前4名，係曼聯薪酬開支暴升嘅主要原因。不過得利於奧脫福球場重新有觀眾入場，以及賣走丹尼爾占士等轉會收入，曼聯係第1季仍然錄得盈利。

今次係曼聯副主席活華特離任前最後一份財政報告，佢喺發表報告後表示：「呢份報告顯示出曼聯喺疫情期間強大嘅財政實力，但球隊嘅首要目標仍然係喺球場上取得成功，領隊、球員同所有職員都非常有決心去達成呢個目標。」