拒絕降薪坐冷板　連格與曼聯談判破裂

足球博彩神器，每日重心提供盡在《彩報》：http://win.on.cc/football/　

曼聯青訓出身，但一直被冷待嘅連格，最快明年1月離開「夢劇場」，結束紅魔生涯。英國傳媒報道，尚餘不足1年合約嘅連格同曼聯續約談判破裂，主要原因係不甘長期坐冷板兼被降薪，最快冬窗將被外借，明年夏天自由轉會。

連格係曼聯嘅「親生仔」，咁講求DNA嘅曼聯卻偏偏對佢愛理不理，出道至今5次被外借，到摩連奴年代才獲穩定上陣機會，但蘇斯克查上任後又打回原形，上季外借到韋斯咸後大爆發，令佢得以重返國家隊，但最終都錯過歐國盃，連格為爭取明年出席世盃機會，不得不同母會決裂。

另有報道指，曼聯今季簽入C朗、華拉尼、查頓辛祖等高價球星，但周薪不足8萬鎊嘅連格喺傾續約時卻要降薪，係人都心淡，亦係促成連格決心離開曼聯嘅主要原因。

報道指，連格離開曼聯後不愁出路，巴塞、AC同馬體會都有意接收，連格經理人近期亦開始同新球會接觸。