美斯踢法甲終於開齋　但評分唔及1位隊友

最強博彩盤路過關神器《串績王》：http://win.on.cc/football/　

周日(21日)凌晨法甲，巴黎聖日耳門(PSG)主場以3比1擊敗南特，球王美斯終於射入加盟PSG以來第1個聯賽入球，但都係被隊友基利安麥巴比搶咗風頭，呢位法國國腳入1球及1次助，被評為全場表現最高分球員。

PSG開波2分鐘就打開紀錄，里安度柏迪利斯遠射，基利安麥巴比加多一腳入網，轉個頭美斯無人看管之下起腳，但被門將救出。

換邊之後，PSG突然陷入困境，先有門將基羅拿華斯被逐，跟住被南特中場高路梅安尼射入扳平1比1。幸好有美斯挺身而出，佢81分鐘傳波，導致南特後衞丹尼斯艾比亞擺烏龍，6分鐘之後再接應基利安麥巴比傳送，射成3比1。

美斯之前喺歐聯為PSG轟入3球，今仗第6次法甲上陣，終於開齋取得首個聯賽入波，美斯今場有114觸球，87次傳球，6次射門4次中目標，賽後被評為7.9分，僅次於基利安麥巴比，證明自己已經擺脫傷患，為周中歐聯作客曼城壯行色。