新帥效應失靈　舒夫真高慘遭寸王教訓

最強博彩盤路過關神器《串績王》：http://win.on.cc/football/　

當謝拉特、沙維分別喺英超、西甲旗開得勝嘅時候，另一位球壇名將舒夫真高亦首次以教練身份再戰意甲，但首仗即輸波，佢執教嘅熱拿亞喺周一(22日)凌晨，主場0比2不敵由「寸王」摩連奴領軍嘅羅馬，證明薑始終係老嘅辣。

昔日AC米蘭傳奇射手舒夫真高今夏離開執教咗5年嘅烏克蘭國家隊之後，早前接手成為熱拿亞主帥，首場面對「戰術大師」摩連奴，立即受到大考驗。

原本兩隊陷入拉鋸局面，但「寸王」臨場調動勝一籌，佢喺75分鐘出人意表，換入18歲小將艾芬拿基恩，發揮奇兵作用，呢位加納前鋒上陣7分鐘就入波，之後再喺補時建功，個人梅開二度。

呢位新星上月先至首次為羅馬披甲，至今3次上陣入2球，摩連奴提拔新人方面，的確眼光獨到。

羅馬贏波之後，總算結束聯賽2連敗，摩連奴可以暫時鬆一口氣，反觀熱拿亞已經連續10場不勝，舒夫真高未來日子唔易過。