葡國神童大翻身 阿仙奴冬季搶購

20211122
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
里爾上季爆冷奪得法甲冠軍,今屆歐聯亦排緊G組第2位,有望取得出線資格,球隊可以創出佳績,中場主力連拿度辛捷士功不可沒,呢位24歲葡萄牙國腳憑出色表現,獲得唔少大球會垂青,英超勁旅阿仙奴計劃明年1月轉會市場重開後簽入佢。
阿仙奴考慮到2位中場湯馬士柏迪、艾利尼將於明年1月離隊出戰非國盃,有需要簽入中場保持實力,會方之所以睇中連拿度辛捷士,除咗因為佢大熟大勇之外,亦由於呢位葡萄牙國腳將於明夏約滿,並無意續約,里爾為免人財兩失,好大機會提早明年1月出售佢,兵工廠就有機可乘。
據悉里爾要求3,500萬鎊轉會費,令阿仙奴有所猶豫,但隨住距離連拿度辛捷士約滿日子愈來愈近,里爾可能會減價。
出身於賓菲加青訓系統嘅連拿度辛捷士屬於「早熟」球員,有份協助葡萄牙奪得2016年歐國盃冠軍,當時年僅19歲,並被拜仁慕尼黑以4,500萬歐元收購,但表現令人失望,更曾經被外借去當時仲係英超球隊嘅史雲斯。
連拿度辛捷士2019年8月正式加盟里爾,獲得重生,之前已經有傳利物浦、巴塞隆拿有意簽入佢,依家阿仙奴都加入爭奪。里爾將於周三(24日)凌晨歐聯G組主場對榜首薩爾斯堡,大家要留意連拿度辛捷士演出。