卡域克首度出征4將缺陣　「福仔」笑晒口

足球博彩神器，每日重心提供盡在《彩報》：http://win.on.cc/football/　

曼聯炒領隊蘇斯克查後，臨時領隊上任前嘅「替工」卡域克頂上，周二(23日)就率領大軍飛去西班牙應付歐聯對維拉利爾嘅大戰，不過就有4位主力缺陣，一眾球員去到機場嗰陣表情嚴肅，只有拉舒福特一個笑得最開懷！

卡域克作為臨時嘅臨時領隊，佢首演前表示：「我同蘇斯克查緊密合作多年，所以有好相似嘅足球理念，當然我有自己嘅個性，我唔想透露太多計劃，但球隊應該點踢、應該要做啲咩，我自己係好清晰，期待快啲落場比賽。」

根據曼聯出發嘅大軍名單，除華拉尼同保羅普巴2名傷兵外，勞基梳爾(腦震盪)同格連活特(新冠肺炎)都未有隨隊，烏拉圭前鋒卡雲尼同樣冇份登機，不過唔排除會喺較後時間自己飛去西班牙歸隊。喺大敗同換帥嘅陰霾下，一眾球員去到機場都眉頭深鎖，只有拉舒福特笑到四萬咁口，似乎蘇斯克查嘅離隊未有對佢造成太大困擾。