【官宣】好波有好報！修夫基續約英格蘭

足球博彩神器，每日重心提供盡在《彩報》：http://win.on.cc/football/　

英格蘭喺今夏歐國盃決賽飲恨得亞軍，不過領隊修夫基帶隊嘅表現仍獲肯定，月初鎖定明年世界盃決賽周席位後，英格蘭足總周一(22日)宣布，修夫基已正式續約3年，將會帶領英格蘭踢埋2024年嘅歐國盃。

現年51歲嘅修夫基原本年薪係300萬鎊，今次續約後人工連獎金增加至最高500萬鎊，佢嘅助手賀蘭特同時獲得續約，可以話係對佢哋最大肯定。修夫基表示：「好開心我同賀蘭特可以延長自己嘅任期，我仍然覺得帶領英格蘭係超級榮幸嘅事，面前會係非常難得嘅機會。」

修夫基喺2016年9月接替艾拿戴斯，原本只係臨時領隊，但上任2個月後即轉為長工，2018年世界盃帶領英格蘭殺入4強，今夏更率英格蘭入歐國盃決賽，而且提拔出菲爾科頓、布卡約沙卡、迪格蘭賴斯等多位年輕球員，表現大獲好評。