勒索事件告一段落　賓施馬判罰緩刑一年

皇家馬德里前鋒賓施馬，被指捲入法國國家隊隊友華布拿被勒索事件，今年年初正式接受審訊，法國檢察官周三（24日）宣布最終判決，裁定賓施馬需要緩刑一年，並支付75,000歐元（約66萬港元）的罰款，事隔六年呢單醜聞終於告一段落。

據悉賓施馬今次被判嘅罪名係串謀勒索，呢條罪喺法國最高判刑係罰款75,000歐元同監禁五年，所以今次佢只係被判緩刑一年已經好好彩。賓施馬周三深夜將隨皇家馬德里，出戰對舒列夫嘅歐聯分組賽賽事，即管睇下「逃過一獄」嘅佢今場會唔會有好表現。

33歲嘅賓施馬被指喺2015年11月扮演「中間人」角色，涉嫌用性愛影片，勒索法國國家隊隊友華布拿15萬歐元，一度被警方拘捕，之後更長達六年無被徵召入國家隊，先後錯過2016年歐國盃、2018年世界盃等大型國際賽事。