35歲迪斯高起孖　國際米蘭破魔咒出線

最強博彩盤路過關神器《串績王》：http://win.on.cc/football/　

周四(25日)凌晨歐聯D組，國際米蘭憑35歲老將迪斯高下半場梅開二度，主場以2比0擊敗薩克達，提早1輪鎖定出線資格，同時打破過去3屆分組賽出局嘅魔咒，總算冇嘥到意甲1個歐聯席位。

國際米蘭今場佔盡上風，曾經喺24分鐘由比列錫射入對手大門，但因為傳波嘅達美安越位在先，被判入球無效。其後迪斯高近門頭槌一頂，被薩克達門將杜賓撲出。

換邊後冇耐，拿達路馬天尼斯射入，但被吹罰犯規在先，國米第2次食詐胡。踢到61分鐘，國際米蘭終於打開紀錄，迪斯高把握對手解圍不遠，後上勁射入網。僅過6分鐘，呢位波斯尼亞國腳頂入成2比0。

同組舒列夫主場0比3不敵皇家馬德里，國際米蘭同皇馬攜手提早1輪出線。國米過去3屆歐聯都分組賽出局，上屆更加排包尾，今屆終於威番1次，新帥施蒙尼恩沙基呢方面比國米前主帥干地更優勝。