5場歐聯入9球　阿積士神鋒創歐聯紀錄

足球博彩神器，每日重心提供盡在《彩報》：http://win.on.cc/football/　

周四(25日)凌晨歐聯C組，阿積士憑後備上陣嘅施巴斯坦賀拿包辦2個入球，作客以2比1反勝比錫達斯，保持5戰5勝。施巴斯坦賀拿亦成為歐聯史上第1位喺職業生涯首5場歐聯入到9球嘅球員。

賽前已經穩奪出線權嘅阿積士，稍有鬆懈之下，被對手博到12碼，基素爾主射入網，為比錫達斯打開紀錄。阿積士喺半場休息之後，立即換入施巴斯坦賀拿搏殺，呢位科特迪瓦國腳不負所托，個人梅開二度，協助阿積士反勝2比1。

27歲嘅施巴斯坦賀拿9月對士砵亭，首次踢歐聯，立即轟入4球，技驚四座，今屆5場分組賽都有波入，累計入9球，打破艾寧夏蘭特嘅紀錄(8球)，成為歐聯史上第1位喺職業生涯首5場歐聯入到9球嘅球員，亦係第1位喺頭5場歐聯分組賽都有波入嘅非洲球員。

施巴斯坦賀拿現時喺歐聯射手榜同羅拔利雲度夫斯基並列一哥，可以話係今屆賽事最大驚喜。