蘭歷克唔止教波咁簡單 手握曼聯復興之匙!

2021年11月26日 08:00
東網電視
更多新聞短片
最強博彩盤路過關神器《串績王》:http://win.on.cc/football/ 
曼聯看守領隊人選揭盅!被譽為「現代足球教父」嘅蘭歷克已答應執教「紅魔鬼」至今個季尾,依家只係等同佢任職嘅莫斯科火車頭傾掂數就可落實。曼聯能夠獲得呢位享負盛名嘅猛人加盟,當然唔止執教半年咁簡單,據報蘭歷克頂完今季之後,將會「升職」做曼聯總監或顧問,完全掌管「紅魔鬼」復興嘅重任,絕對係費格遜之後最重要嘅曼聯揸弗人!
63歲嘅蘭歷克依家係莫斯科火車頭嘅體育及發展主管,雖然5年前已決定放低教鞭,轉型做幕後策劃人,但18/19球季短暫復出執教RB萊比錫,仍然有55%勝率,兼帶領球隊拎到歐聯資格及打入德國盃決賽,足證佢嘅教波功力從未減退。由於曼聯同莫斯科火車頭仲未完全達成一致,加上申請工作證需時,蘭歷克唔會喺周一(29日)作客車路士領軍,預料下周五(3日)對阿仙奴首演。
據著名記者羅曼奴透露,蘭歷克喺今年1月曾經拒絕執教車路士,因為唔想「降格」做看守領隊,今次突然答應出山執教曼聯,最大原因係佢完成餘下半季賽事後,將會轉任曼聯嘅總監或顧問一職,傳聞任期為2年,全權統籌曼聯嘅轉會、組軍工作同發展方向,亦會係「費Sir」退休之後,曼聯第1個可以全權話事嘅人,優厚條件成功吸引蘭歷克加盟。
延伸閱讀:【曼聯改踢4222?蘭歷克曾嫌C朗「太老」】
蘭歷克以往執教史浩克04、RB萊比錫都有傑出成就,不過佢升任管理層後獲得更大好評,作為紅牛集團足球發展主管,佢一手將旗下兩大球隊RB萊比錫同薩爾斯堡打造成歐洲勁旅,提拔出拿高斯文、杜曹等頂尖名帥,亦獨具慧眼發掘出艾寧夏蘭特、沙迪奧文尼、烏柏美卡奴等寶石,曼聯將復興鎖匙交到佢手上,絕對係明智之選!