熱刺不敵梅拿隨時出局 干地知道「瀨嘢」

2021年11月26日 10:01
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
英超勁旅熱刺早前獲干地加盟後,一度令球迷充滿希望,不過周五(26日)歐協聯分組賽,熱刺作客弱旅梅拿竟然輸1比2,即時陷入出局危機!干地賽後表示經過3個星期執教後,依家終於發現球隊唔係想像中咁高水平,大有「瀨嘢」味道!
熱刺今場半場出擊,但依然有哈利卡尼正選掛帥,不過開波11分鐘就被梅拿偷襲得手,32分鐘更有賴恩施斯隆魯莽踢人兩黃被逐。10人應戰嘅熱刺,下半場早段換入孫興民、盧卡斯莫拉等主力上陣,終於喺72分鐘由哈利卡尼追平,點知去到補時階段,梅拿再憑一次反擊入波絕殺,令熱刺以1比2落敗。
熱刺輸波後,喺G組5戰得7分同維迪斯同分,對賽成績一樣,暫以得失球差壓過對方排2位,熱刺最後一輪要對已經出線嘅雷恩,而維迪斯就主場迎戰包尾嘅梅拿。
干地賽後失望表示:「經過3個星期(執教)後,我終於明白呢個情況並唔簡單,球隊有好多工作要做去提升球隊質素,我哋同頂尖球隊有一大段距離。我唔係魔術師,我見到好多球員好落力去進步,但有時咁樣係唔足夠。」