干地專收曼聯廢柴　今次睇中佢

一直都話干地好啱曼聯，可惜曼聯管理層唔鍾意，認為佢係摩連奴2.0，但干地其實好喜歡曼聯兵，之前國米就簽入多位曼聯棄將，並順利重生，今季佢執教熱刺，消息指又想打曼聯兵主意，今次目標係後備中堅艾歷拜利。

睇番干地執教國際米蘭時期，佢手上有盧卡古、阿歷斯山齊士、艾舒利楊格，共3件曼聯棄將，結果佢成功帶領球隊重奪失落11年嘅意甲冠軍，即使係首季未能奪冠，都只落後祖雲達斯1分，3位曼聯棄將喺佢手上都鹹魚翻生。

今季干地未能入主曼聯，執教熱刺，由於熱刺嘅問題實在太多，必須增兵改造，而首個目標就係搵中堅，干地嘅眼光落在曼聯身上，睇中半紅不黑嘅27歲科特迪瓦中堅艾歷拜利。

艾歷拜利喺曼聯基本上冇得出場，早前曼市打吡獲正選機會，佢即輸個擺烏龍，半場被收起，睇怕都長放雪櫃，不過干地有信心令佢重生，就好似之前幾件曼聯棄將一樣，如果熱刺探盤，相信曼聯都會平價放人。