車路士慘情折翼 芝維爾抖至少6周

2021年11月27日 09:00
東網電視
更多新聞短片
最強博彩盤路過關神器《串績王》:http://win.on.cc/football/ 
車路士今季爭霸遇上重大打擊!今季表現突出嘅左閘芝維爾,周中歐聯對祖雲達斯一仗受傷,經檢查後證實前十字韌帶受創,最少要抖6個星期,如果之後再發現要進行手術,養傷期將會大幅延長,對車路士衝擊歐聯同英超有極大影響。
車路士喺歐聯4比0大破祖雲達斯,但芝維爾比賽期間撞傷膝頭,要由兩名軍醫扶住出場,檢查結果亦令人失望,領隊杜曹透露:「佢有部份嘅前十字韌帶傷患,我哋選擇用保守療法,未來6個星期會係關鍵,呢段時間會決定佢需唔需要做手術,(治療)初步反應係好正面,6個星期係最好嘅情況,但亦有最壞情況同埋灰色地帶,但依家講最壞情況係冇意思。」
車路士喺杜曹嘅戰術之下,兩個翼衛角色非常關鍵,左翼衛芝維爾同右翼衛列斯占士今季大放異彩,芝維爾今季踢6場英超已有3個入波同1次助攻,喺佢養傷期間,車路士會用馬高斯阿朗素出任左翼衛正選。