阿仙奴刮青春風暴 兩蛋劏「鵲」

2021年11月27日 22:33
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周六晚(27日)英超頭場,阿仙奴憑兩位小將布卡約沙卡同加比爾馬天尼利各省1粒,喺主場以2:0擊敗「喜鵲」紐卡素,近10場聯賽贏7仗,繼續刮起青春風暴,相反紐卡素仲未開齋,護級之路更加困難。
雖然紐卡素有確診新冠肺炎嘅新帥艾迪侯域好番,今仗復出首次親自督師,但阿仙奴藉地利一開波即搶攻,先有布卡約沙卡接應長傳射斜,跟住有代替拿卡錫迪擔正嘅馬田奧迪加特妙射罰球,畀客軍門將杜巴夫卡僅僅救出。之後紐卡素有零星反撲,舒維爾於禁區外放冷箭,阿仙奴門將蘭斯達爾撲到再中楣,抹一把汗,完半場前阿仙奴中場伊美路維頭槌近頂,畀杜巴夫卡撲出不遠,奧巴美揚近門執雞竟然中柱,認真嘥料。
易邊後阿仙奴繼續狂攻,56分鐘紐奴泰華利斯妙傳,布卡約沙卡於左路窄位射遠柱破網,雖然呢位入波功臣拉傷被迫退下火線,但入替佢嘅加比爾馬天尼利,於66分鐘喺右路入楔,趁杜巴夫卡出迎快腳一「逗」成2比0,亦係佢今季開齋波,最終阿仙奴淨勝2球,近10仗聯賽取得7勝2和僅1敗,未有因上仗慘吞利物浦4蛋而失去信心,伊美路維、布卡約沙卡、馬田奧迪加特及加比爾馬天尼利等新仔,愈踢愈有信心,帶領球隊力爭前4。紐卡素今季踢咗13輪都只得6和7負,係今季英超唯一未開齋球隊,仲要場場有失波,繼續排包尾,艾迪侯域真係要再諗吓計。