祖達閃電入波VVD破網　利物浦炒聖人

最強博彩盤路過關神器《串績王》：http://win.on.cc/football/　

周六晚英超賽事，利物浦主場4比0大勝修咸頓。「紅軍」繼續展示超強攻力，迪亞高祖達早段起孖，兼創下球隊2年半以來最快入波紀錄，華基爾雲迪積克1年零兩個月後再取得英超入球，輕鬆大炒「聖人」全取3分，升上聯賽次席。

迪亞高祖達於開賽97秒攻破修咸頓大門，為利物浦領先1比0，紅軍對上一個最快入球係2019年4月對哈特斯菲爾德，當時開賽僅15秒入波，今仗領先亦打窒對手，32分鐘祖達再建一功成功起孖，5分鐘後堤亞高艾簡達拿後上撞射破網，繼上仗歐聯對波圖後連續兩仗有「士哥」，利物浦半場領先3比0。

下半場52分鐘，華基爾雲迪積克接應角球，第一時間窩利勁射破網，為球隊贏到4比0，入波後VVD攬住隊友百感交集，呢球亦係佢自去年9月對列斯聯入波後，因膝傷長時間缺陣，相隔1年零兩個月後再取得英超入球，對手更是其前球會修咸頓。最終利物浦大勝4比0完場，連續兩場英超以同樣比數獲勝。