迪比有大將之風 讓畀古天奴主射12碼

2021年11月28日 11:01
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
周日(28日)凌晨西甲,巴塞隆拿作客以3比1擊敗維拉利爾,沙維執教之後,取得西甲2連勝。今場踢到補時出現令人感動一幕,巴塞獲得12碼,「首席劊子手」迪比大方讓出主射權畀事業陷入低谷嘅菲臘比古天奴建功,顯示球隊非常團結。
巴塞隆拿今場創造大量攻勢,包括20歲小將艾薩索利頭槌攻門,被門將魯利撲到再中楣彈出,另1位新星加維勁射中柱唔入,雙方上半場互交白卷。
不過,換邊後僅3分鐘,巴塞就入波,迪比起腳,維拉利爾門將魯利接波甩手,法蘭基迪莊補射入空門,維拉利爾靠後備上陣嘅卓禾斯射入扳平。
眼見雙方將打和之際,踢到88分鐘,迪比把握對手解圍失誤,殺入禁區再扭過門將魯利,窄角度射入空門。
去到補時,菲臘比古天奴博到12碼,一直負責主射12碼嘅迪比決定讓畀呢位巴西國腳操刀,古天奴一射入網,亦係佢繼10月對華倫西亞之後,今季第2個入球。賽後沙維表示,對於迪比「讓射」感到驚喜,認為球隊已經變成一個大家庭。
值得一提,維拉利爾教練艾美利非常不滿球證今場執法水平,包括法蘭基迪莊嘅入球原本被判無效,但經VAR檢視後,改判有效,同埋巴塞中堅碧基禁區內犯手球,冇吹罰12碼。
完場之後,艾美利更加同沙維發生爭吵,好彩兩人冷靜之後握手言和。