梅拿助攻幫拜仁贏波　追平碧根鮑華紀錄

足球博彩神器，每日重心提供盡在《彩報》：http://win.on.cc/football/　

周日(28日)凌晨德甲，拜仁慕尼黑主場出擊，對排尾二嘅比勒費爾德，僅靠利萊辛尼下半場入波，小勝1比0。今場波對於拜仁中場湯馬士梅拿有特別意義，因為係佢第396次德甲上陣，同德國傳奇名宿碧根鮑華睇齊，並列拜仁史上喺德甲上陣次數第6多嘅球員。

32歲嘅湯馬士梅拿今場表現活躍，上半場有1次頭槌攻門，幾乎入網，可惜被對手護空門解圍。換邊之後，湯馬士梅拿橫傳畀利萊辛尼勁射入網，幫拜仁小勝1比0，繼續以1分領先第2位多蒙特。

賽後湯馬士梅拿並冇貪功，反而力撐隊友羅拔利雲度夫斯基先至係球隊靈魂，並認為呢位波蘭國腳可以獲得今年金球獎：「上年金球獎取消咗，但羅拔利雲度夫斯基仍然非常努力，上季打破單季德甲最多入球紀錄，佢值得攞獎。」

值得一提，拜仁慕尼黑今年德甲已經轟入102球，打破1977年科隆入101球嘅紀錄，成為單年德甲最多入波嘅球隊。