紅魔立立亂有排執 車仔踩油搶W

2021年11月28日 16:03
東網電視
更多新聞短片
最強博彩盤路過關神器《串績王》:http://win.on.cc/football/ 
周一(29日)凌晨英超重頭戲,榜首車路士主場迎戰曼聯,車路士經過德國名帥杜曹改造後,踢法攻守兼備,近6場聯賽5勝1和,甚具冠軍相,趁主場之利必踩油乘勝追擊。「紅魔鬼」領隊蘇斯克查剛剛落鑊,內部立立亂下暫時繼續由助教卡域克帶隊,點睇都唔係杜曹手腳,一於熱捧車路士主勝。(Now 621及611周一凌晨零時30分直播)
車路士領隊杜曹建立嘅3421陣式,發揮整體戰最強威力,即使射手盧卡古養傷,攻力仍然有增無減,上場英超作客大勝李斯特城3比0,其中兩個入球來自後衞魯迪格及防中尼高路簡迪,而剛周中歐聯大炒祖雲達斯4比0,就分別由4位球員建功,「敗家仔」迪姆華拿復出都有波入,可見佢哋進攻點多到數唔晒,令對手防不勝防。除進攻出色,車路士防守亦勁穩陣,今季聯賽只失4球冠絕英超,等閒之輩難以攻入車仔大門。
曼聯防守脆弱不堪
論球員質素曼聯其實唔輸蝕,可惜欠缺一套有效戰術,往往靠球員個人能力,搞到成績不濟。同車仔唔同,「紅魔鬼」防線極度鬆散,就算門將迪基亞幾好身手都無補於事,上場對住屈福特都要失4粒,今季12場聯賽已失21球,加上中堅哈利馬古尼停賽,華拉尼及勞基梳爾有傷,令後防雪上加霜。雖然上場歐聯擊敗維拉利爾提早出線,但佢哋踢英超水準遠不及歐聯,近5場聯賽輸4場,今場隨時打回原形。